Lɣiḍ deg tmurt icawiyen

            I tikkelt-nniḍen, aneɣlaf amezewaru Ɛebd Elmalek Sellal  ur isaweḍ ara ad yewzen imeslayen-is, akken ad yaweḍ ad d-iḍeqqer awal ara yeǧǧen tamɣiwent n icawiyen ad terfu, ad d-tessebyen lɣiḍ-is ɣef sellal, aneggaru-a i yesseɣlin deg leqder d ccan n yicawiyen s tenfalit yenna deg wasseni n Lǧemɛa iɛeddan deg tagara n temlilit i ijemlen akk iqeddacen deg tikli n lboṭ ɣer yidis n uselway Ɛebd Lɛaziz Butefliqa. yenna : « Akken qqaren deg Qsenṭina ; Ccawiya ḥaca reẓq Rebbi ».

          Batna, Xencla akked Um Lebwaqi, yewweḍ-iten lefqeɛ ɣer lḥed-is, anda  ssawḍen fɣen-d ɣer iberdan, bdant tmesbaniyin mgal Sellal. Deg tesdawit « Lḥaǧ Lexḍer » n Batna, fɣen-d inelmaden ad d-sufɣen lqerḥ-nsen, ineggura-a ssawalen s tenfaliyin yemgaraden, gar-asent : « Zerwal muqel-aɣ-id, Sellal yerra-d fell-aneɣ », « Benbulɛid muqel-aɣ-id, Faqaqir yewwet-d deg-neɣ », «  a wid isekten, ula d kunwi terza-ken taluft » akken i d-ttalsen dima i tenfalit « Ulac smaḥ, ulac ».

         Ɣas akka Sellal yessuter ad as-surfen ɣaf wawal yenna, akken daɣen i yebɣa ad yerdu ticebbakin tinmettiyen (réseaux sociaux), d akken d nutni i yessameɣren taluft ; yenna d akken yettzux s icawiyen, yettzux s yirgazen sɛan, imi din i teffeɣ tersast tamezwarut deg ṭrad azzayri, akken i d-isebgen d akken ur yerri ara aɣref acawi deg ṭṭerf, akken daɣen ur iteg ara lemgerda gar iɣerfan izzayriyen anda ma llan macca Asteqsi ad iqim d win ara iḍulen : Ma yella ad yaweḍ ad iqenneɛ neɣ ad isexsi timest i izehren deg ulawen n yicawiyen neɣ ala ?  

 

 

Tukkist deg uɣmis "Tiɣremt" X.Y