Tafriqt n ugafa d imaziɣen i tt-izedɣen akken i msefhamen imazrayen, amaziɣ anamek-is d argaz ilelli imi amaziɣ ur iḥemmel ara ddel.Tillisa n tmurt umaziɣ : Seg lǧiha n usamar d Maseṛ, seg umalud agaraw n Lutluntik, seg ugafa d ill agrakal, seg tama n unẓul d tamurt n iberkanen.Aṭas i tt-id-ikecmen n leǧnas, deg-sen : ifniqiyen, irumaniyen, Ibiẓantiniyen, akked Waɛraben akked wiyyaḍ…Uqbel ad d-kecmen yenselmen, d Ibizantiyen i yellan ṭṭfen Tripuli, ṭṭfen Bizasen deg Tunes akked kra n temnaḍin deg Lmeɣreb Alemmas akka am Bagay, Ṭamugadi akked Lumbaz deg usamar deg Tasut tis Setta.

Deg wayen yerzan leɛrac deg-sent ad d-nebder “Zennata” i yellan seg Ṭarablus alma d asif n Melwiya deg Lmeɣreb imixfiw, daxel n Zennata ad naf leɛṛac d imecṭuḥen akka am Ǧṛawa d lɛeṛc n Dihiya deg Luras, akk d lɛeṛc n Meɣṛawa akked Bni Yefren deg umalu n lezzayer akked Lmeɣreb imixfiw.

 

Tallit n unekcum tamezwarut.

 Résultat de recherche d'images pour "l'invasion arabe en afrique du nord"      Deg udlis n Ernest Mercier, Histoire de L’afrique septentrionale, yenna d akken deg tallit n lxalifa Ɛumeṛ bnu Lxeṭṭab  iceggeɛ Ɛumeṛ Bnu Lqays yeṭṭef Maser deg 640 s.t.Ɛ, anda yewweḍ yesreɣ tamkerḍit n « Aleksendri », d ticreḍt n uɣelluy n udabu abiẓanṭi, swaya ssulin, sbedden adabu n yenselmen deg Maser.

Deg useggas n 20 hiǧri yessaweḍ Ɛumer bnu lqays ad yekcem ɣer Ṭarablus s shala, umbeɛd iceggeɛ Ɛuqba bnu Nafeɛ yeẓdem ɣaf Berqa akked Fezzan deg Libya, ma d netta yuɣal ɣer Maser ; imazrayen qaren-d, imaziɣen yellan deg Ṭarablus deg wakken ugaden ad uqlen d aklan n waɛraben, ffkan azal n 13 n alef d ttekka n wureɣ (ddheb), llant temnaḍin i yefkan akk ayen i sɛan d leɣella, ula d araw-nnsen i Ɛumer bnu lqays i wakken ad yeffeɣ deg tmurt-nnsen. Macca Ɛumeṛ bnu Lɛas deg wakken yewwi-t ṭṭmeɛ, yebɣa ad d-yuɣal, ad ikemmel ɣer tefriqt (Tunes), macca yegguma-as lxalifa Ɛumeṛ Bnu Lxeṭṭab, akken yenna ɣaf tafriqt ugafa d akken d tamurt n lfiraq akkedd lfitna, ihi deg tallit n Ɛumeṛ Bnu Lxeṭṭab ur kcimen ara almi d tallit n Ɛetman Bnu Ɛeffan.

Yettwanɣa Ɛumeṛ Bnu Lxeṭṭab macca Uqbell ad yemmet yeḍleb ad d-uɣal lxalifa ɣer Yiwen gar 06 n suḥaba n Rasul Fell-as taẓallit akked slam. Seld krad n wussan n ucawer sbedden-d Ɛetman bnu Ɛeffan d lxalifa.

Ɛetman Bnu Ɛeffan i yeṭṭefen amkan n Ɛumer ur yebɣi wara ad yekkes ula d yiwen deg udabu, yeǧǧa Ɛumer bnu Lqays d imḍebber ɣaf Maser, yesbed ɣaf uqerruy n yiggen gmas s tuṭḍa : Abd Llah Bnu Saɛd Abi Ṭaher, tadra-s n Maser ɣer yidis-is yerna-as Abd Llah Bnu Naffeɛ Bnu Abd Lqays akked Abd Llah Bnu Naffeɛ Bnu Elḥusayn, yekcem ɣer tefriqt n ugafa s yiggen yesɛa azal n 20 alef n yiserdasen, yewweḍ ɣer Qabes yeṭṭef-itt, iceggeɛ tibratin ɣer myal tiɣmert i as-d-yezzin, netta yettkemmil tiwɣi.

Deg ubrid-is ɣer Sbertla anda yella yeḥkem yiwen qqaren-as Grigor i d-yewwin timunent ɣaf ibiẓanṭiyen, yeḥkem almi d Ṭanǧa, Grigur ur as-yehwi wara wayen yellan deg tebratin-nni, ihi ihegga iman-is ad iqabel Ɛebd Llah Bnu Saɛd Abi Taher, i wakken ad iseqwu tanefsit n yiserdasen-is dlebɣi n rbeḥ deg ulawen-nsen yewɛed ad yefk afus n yell-is i win ara yenɣen Ɛebd Llah Bnu Saɛd, Bnu Saɛd imi yesla s temsalt-a yewɛed ula d netta iserdasen-is ad as-yefk afus n yelli-s n Grigore i win ara yenɣen aneggaru-a.

Amennuɣ d win yeṭfen acḥal n wussan, deg wakken yeqqwa yenna : Ernest Mercier deg udlis-is : Histoire de L’afrique septentrionale :  « Ad ttnaɣen deg ssbeḥ alma d azal syin akin ad nejmaɛen i wakken ad kemlen azekka-nni ». Yebda deg wakken iḍul umennuɣ ɛeggu ɣaf yignen-a i sin, s waya iceggeɛ-d lxalifa Ɛutman Bnu Ɛeffan Bnu Zubayr s kra n yiserdasen d zyada, imi ḥebsen imenɣi am yal tikkelt ẓeḍmen fell-asen waɛraben lweqt n usteɛfu, s waya yettwanɣa Grigor. Yenna Lqayrewani d akken Bnu Zubayr yuɣ yell-is n Grigor yuɣal ɣer usamar ad isiweḍ isallen n rebḥ n yenselmen deg 27 Hiǧri.

Yeḥbes imenɣi uɣalen waɛraben ɣer Maser akked usamar, ferqen lerbaḥ d yeglafen i d-wwin, almi d tallit n Muɛawiya Bnu Abi Sufyan i d-uɣalen.

Deg useggas n 44 hiǧri yerra Muɛawiya Bnu Abi Sufyan ɣer tefriqt ugafa Muɛawiya Bnu Hudayg s wazal n 10 Alaf n yiserdasen, ɣer yidis-is Bnu Umer Bnu Lxeṭṭab akked Ɛebd Llah Bnu Zuhayr Bnu Lɛewwam, Ɛebd Lmalek Bnu Meṛwan akked waṭas n wid i imucaɛen seg teqbilt n Qurayc, yekcem ɣer umennuɣ mgal imaziɣen almi yeṭṭef Ǧerba, Benzirt Akked Sus anda i d-wwin Aṭas n yeglafen akked lxir, uɣalen-d ɣer Maser imi ur sɛin ara tamdint i deg ara qimen.

Tallit n Unekcum akked urkad 50 ɣer 85 hiǧri:

Nenna-d deg tallit n tamezwarut aɛraben ur sawḍen ara ad qimen deg tefriqt ugafa, maca deg tallit-a, dima deg tallit n Muɛawiya Bnu abi Sufiya, iceggeɛ i tikkelt-nniḍen Ɛuqba Bnu Naffeɛ  yuɣal ɣer tefriqt ugafa, macca ur iɛedda wara s swaḥel, yeṭṭef abrid-is seg tama n unẓul, yekcem s wazal n 10 Alaf n yiserdasen, yeṭṭef kra n temdinin am Ɣeddams deg Libya, Qafṣa deg Tunes, Qasṭilya akked yiwet n temnaṭ qaren-as Lǧarid deg Tunes. Deg temdinin-a i d-nebder nnan imazrayen yenɣa aṭas n yimaziɣen, yessexreb akk timdinin-nnsen, syin yerra lwelha-s ɣer lebni n yiwet n temdint i yinselmen deg tefriqt (Tunes), tamdint-a isemma-as « Lqayrawan », yebna-tt deg 54 hiǧri yerna-as yiwet n Tmesgida.

Ibeddel Muɛawiya deg udabu n Maser, yerra Maslama Bnu Maxlad Yekkes Ɛuqba, yerra ɣef uqerruy n yiggen Dinnar Abu Lmuhaǧir.

Ihi imi yekcem Abu Lmuhaǧir ɣer tefriqt yekka-d akk s wadda i wayen yexdem Ɛuqba, yessedrem Lqayrawan, yebna Tamdint-nniḍen umi isemma « Takirwan » deg useggas n 55 hiǧri anda yeḥres imdanen ad zedɣen dinn-a, sin yekcem ɣer lmeɣreb alemmas, mi yewweḍ yekcem ɣer Mila yexdem din leɛwanser umi qqaren ass-a Leɛwanser n Abu Lmuhaǧir, seg wayen yexdem d ayen yelhan, yewweḍ yekcem ɣer wulawen n yimaziɣen, ger wid yellan Mucaɛit deg tallit-nni anaf Aksel (kusayla), i d-ibedden mgal-ines deg useggas n 59 hiǧri maca aneggaru-a ur isawweḍ ara ad yeɣleb aɛraben. Abu Lmuhaǧir yeḍfer Aksel s tsertit n Liḥsan Almi i yewweḍ yekcem ɣer wul-is, yuɣal d Amdakkul-is, Uɣalen ttemseframen aṭas.

Ɛuqba Bnu Nafeɛ iɣaḍ-it lḥal mliḥ s wayen yexdem Abu lmuhaǧir, iruḥ ɣer lxalifa Abu Sufyan yeṭṭleb-as ad t-id-yerr ɣer tefriqt ugafa, icetka-as ɣaf wayen yexdem Abu lmuhaǧir, yeqbel Abu Sufyan, yenna-as ad ak-rreɣ ɣer tefriqt, Macca yemmut ur t-id-yerri ara, almi yeṭṭef mmi-s lxilafa Yazid Bnu Muɛawiya deg useggas n 62 hiǧri, Macca ur yekkis ara Abu Lmuhaǧir.

Ɛuqba yuɣal ireqqeɛ Lqayrawan, ihegga iman-is ad ikemmel tiwɣi, yuɣal yeṭṭef Berqa anda yenɣa aṭas n yimaziɣen, din yejmeɛ-d aṭas n yeglafen. Yuɣal teḍra-d yiwet n teqṣit anda i d-tella cceḥna d tameqqrant gar-as akked Aksel. Wuqba yewwi-d Aksel i yellan d amasiḥi ɣer wanda i ttillin iqerray d ccuyux n Waɛraben, yumer-it ad yezlu ikerri. Aksel yegguma macca Ɛuqba iḥers-it, ur yufi wara d acu ara yexdem Aksel, ihi qqaren-d imazrayen yezla ikerri-nni kan akken s ibeddi, imi i d-yemsex d idammen isfeḍ-iten ɣer tamar-is kan akken yettmuqul ɣer Ɛuqba. Uqba isteqsa d acu i d-lmeɛna-s tigawt-nni i as-d-yexdem, yesfehm-as-d Abu Lmuhaǧir yenna-as,  yenna-ak aqlin ttgallaɣ fell-ak.

Aksel yessaweḍ yerwel yerra ɣer temdint umi qaren Tahuda. Ɛuqba yeǧǧa Abu Lmuhaǧir deg lqayrawan, iruḥ yebda tiwɣi ɣer umalu, yewweḍ ɣer Bagay deg Luras, ikemmel ɣer Lumbaz, Ikemmel ɣer Adna (Msila), ɣer Cclef, Tihert, Tlemsan, Tanǧa deg lmeɣreb Imixfiw, almi yewweḍ ɣer Asafi deg Luṭluntik, syin Ɛuqba yuɣal-d deg ubrid-is ɣert Beskra (tahuda) dɣa din i as-dyeqqreɛ abrid, yeẓdem-d fell-as Aksel ifuk umennuɣ s rebḥ n yimaziɣen, yenɣa Ɛuqba deg useggas n 63 hiǧri. Zhir n rbeḥ n yimaziɣen d lmut n Ɛuqba deg ufus n Aksel yewweḍ almi d asamar.

Zahir Bnu Lqays i yellan deg ubrid-is ɣer tefriqt yerwel ɣer Berqa yeqqim din-a azal n 5 iseggasen Almi i d-yejmeɛ iggen d ameqrran ma d Aksel yeṭṭef lqayrawan. deg usegggas n 69 hiǧri yekcem-d Bnu Lqays yennuɣ mgal Aksel Almi i at-yenɣa deg Mimes, imir kan rnan nɣant ula d netta ibiẓantiniyen.

Imi yettwanɣa Zuhayr Bnu lqays yettwaceggeɛ-d deg umkan-is Ḥessan Bnu Nuɛman imi i at-yewɛed Lxalifa Ɛebd Lmalek Bnu Merwan As-d-yelli tiwwura n lamana n yinselmen, Yefkayas-d azal n 40 Alef n yiserdasen, ayen ur yeḍrin ara akk deg wayen iɛeddan, iwakken kan ad yeṭṭef tafriqt uqafa i lebda.

Yekcem-d deg useggas n 76 hiǧri ɣer Siqilya sin yekcem ɣer Qerṭaǧ isexreb tamdint n ibiẓantiyen, syin akin ikemmel abrid-is almi i qrib ad yaweḍ ɣer lɛerc n Ǧrawa. Ih teɛlem Dihiya s Ḥassan ad d-itteddu thegga-d iman-is. Imenɣi amezwaru yeḍra-d deg 77 hiǧri, amennuɣ d win qessiḥen, ifuk ɣer tagara s rrebḥ n Diheya, aṭas n yenselmen i teṭṭef ɣer lḥebs, macca tuɣal tserreḥ-asen siwa yiwen, qaren-as Xaled Bnu Lyazid, terra-t gar warraw-is, Ɛutman yerwel ɣer Berqa yeqqim dinn-a azal n 5 iseggasen, deg tallit-nni Bnu Lyazid, yettceggiɛ isallen ɣaf liḥala n yimaziɣen i yellan terwi, texreb ; Imi diheya teṭṭleb deg ugdud-is ad serɣen tiferkiwin ad sluɣen lebyur n waman siwwa win yellan ttessen deg-s nutni, s waya yeɣli-d Llaẓ akked Ccwal gar-asen, ffɣen-d kra mgal-is.

Ḥessan Bnu Nuɛman ifuṛes taggnit, yuɣal-d ɣer ɣur-s, tesla Dihiya ad d-iteddu tenna i warraw-is, aten-iyi Waɛraben ad d-teddun eddut yid-sen.

Arraw n Dihiya Ddan d tama n yinselmen, dɣa yekker imenɣi d ameqqran, llan imazrayen i d-yeqqaren deg wakken yeǧhed umennuɣ nnwan ur d-yettɣim ula d yiwen d amuddur, ifuk s rrebḥ n yenselmen d tmenɣiwt n Dihiya deg Bir lɛateb deg 82 hiǧri. Aṭas n yimaziɣen i kecmen ɣer lislam ma d aqerruy n Diheya yettwaceggeɛ ɣer usamar.

 

Deg wakken imaziɣen d imdanen i yesɛan nniya yelhan, ttamnen s wayen i d-ḥekkun neɣ i d-wwin wiyyaḍ-nniḍen, Aɛraben fursen taggnit kecmen-d ṭṭfen tamurt n tefriqt n ugafa s wayen i as-d-zwaren kecmen aqbel ɣer wulawen n yimaziɣen, ayen ara ad nnaf deg udlis n Mmas Azeddin Thagemount: la rien Diheya. Yenna deg-s: « Aṭas n yimaziɣen  i as-d-yefɣen mgal, imi ttxemmimen ur d-yewwi wara lḥal ad nnaɣen mgal inselmen ! Axaṭer d atmaten deg tesreḍt », s waya yerna izad waffud n waɛraben akken sawḍen ṭṭfen tafriqt n ugafa ɣer  wass-a, tewweḍ tekcem taɛrabt ɣer iqerray n yemdanen, yal amaziɣ ama d ineslem ama xaṭṭi, imi imaziɣen seg zik akken nnan imazrayen ”imaziɣen ttarun ddima s Tutlayt n yimnekcem, ma nefka-d amedya yella Yuba wis sin i yuran s tlatinit akked Sifaks i yuran s tegrigit, Saint Augustin i yuran daɣen s tlatinit, ɣer wass-a akka ttarun s tefransist akked taɛrabt.

 

X.Y

"Tukkist deg Uɣmis "Tiɣremt"