D acu i tenniḍ ?

Sseba n lḥers ɣef ugdud, d leḥsab i gan wiyaḍ akken ad d-yeḍru, neɣ d ayen yuran deg unyir n tmurt, neɣ d ayen i icuban deɛwessu, traysu !

Tamurt, bɣan ad as-gren iḍudan-is daxel n tessirt, imi iḍaren-is dayen ɛeddan yakan, ɛeddan almi agdud yeḥsa ur tɛawed ad tbedd fell-asen ! Dayen tɛab, gran-d kan ifassen-is akken asen-kemlen akken ur ten-teggar ara akken ad tsuter afus n tallalt, neɣ ahat yes-sen ad tizmir ad tebnu, ad tɛiwed lsas ɣef ara tbedd, ɣas akka ur tleḥu ara ɣer zzat macca tezmer ad tbedd deg yiwen umkan, akken axxi ur tettkemmil ara alma tettexnunus deg lqaɛa ! S leɛḍil ad d-taf ttawil s wayes ara taẓ ɣer zzat, cwiṭ-cwiṭ alma tuɣal tettazal am nettat am tmura-nniḍen i as-dyezzin.  Aya d ayen ur bɣin, myal tiktiwin i d-ttaken ssebganen-t-d tawwurt n uẓekka i as-d-ttheggin ad ttmeṭlen, aẓekka yeɣza, timedlin urɛad, ad tt-gren ɣer daxel war ma rran fell-as timedlin, akken ad d-iɛeddi yifis ad ttyeddem akka ad tt-yečč d lǧifa, ad d-yeǧǧ iɣsan-is ! aɛaǧaba, ur zmiren ara ula ad tt-setren ; Lmut, nɣan-tt meqqar ad tt-setren, ad rren fell-as timedlin akken ur d-yettɛedi ara win ara ad yekksen fell-as sser !

Ayen nettwali ass-a, leǧǧnas akk rzan-d ad walin anda i tewweḍ tmurt, ad zren d acu ara asen-d-isaḥen, anwa i ten-id-yezwaren ! Zzin-as-d akk akken ad ččen amur-nsen ! Ṭṭmeɛ yezdeɣ ulawen, deg yiwet n ddurt uzlen-d azal n Kraḍ n yineɣlafen n tmura tiberraniyin ad sentun accaren-nsen, ad ḥewsen aḥric deg-s, send ad ifat lḥal ! Asteqsi agejdan n wass-a, anwa i izemren ad yessemneɛ tamurt-is deg yifisen-a i as-dyezzin ttrajun-tt ad tessufeɣ tarwiḥt ? Agdud ɣur-s lxetyar, akken ad d-yesbedd aragaz i yettwali ad ten-yester, ad yer tawwurt ɣef wudmawen-nsen akken ur d-garen ara iffasen n biḥwasu akken ad ɣelten ayen ur zriɛen. Ad yeṭṭef rebbi sser, win  yebɣun yili d aqerruy, taɛkkemt fell-as ad taẓay ; Aɣbel-nniḍen, wessen kan ma yezmer ad iqenneɛ agdud-is i yefkan deg-s laman, wessen kan ma yezmer ad ibeddel udem n rrehba akked llaẓ akked wudem n temɛict i yeskkenfen agdud deg myal tamnaḍt. Ulac taɣult ɣur ur yekkcim cwal, agdud yeɛya, yeggra-yas-d siwa usirem, ur yezmir ad iger asurif ɣer zzat, yettraǧǧu kan anwa ara t-id-yessufɣen deg texmirt i t-ijebden ad yezder !

Ayɣer amdan ass-a ur yezmir ara ad ibeddel taswiḥt ? Ayɣer i yettraǧǧu deg yiwen akken ad as-d-yefk azfer-is ? d acu i at-yeǧǧan ad yeknu zzat n uzaylal, ayen ur yettxemmim ara ad d-yaf tifrat, ad idawi aṭṭan i ten-izedɣen, ayɣer ur igar ara afus s timmad-is akken ad ibeddel Lmektub-is ?!

X.Y