D acu i tenniḍ ?

« Swab yella ɣer umeqran, yella ɣer umecṭuḥ », yeqɛed yinzi i tlufa n wass-a ? D ayen ur iqebbel leɛqel, mi yeɛreḍ ilemẓi ad d-yini awal, ad as-inin : « Eskket ! kečč ur tessineḍ ara !».

         Sfehmet-iyi-d ayɣer ! mazal ur fhimeɣ ara d acu i ken-yerḥan deg yilmeẓyen, ayɣer i tebɣam ad ten-tɛegbem ! Nekk daɣen ad awen-iniɣ : « Ur ḥeqqert ara », d awal i d-yettales Muḥya fell-as yeɛfu yerḥem, myal tikkelt deg usefru i umi isemma “ur ḥeqqrt ara!”. Awal-a yebna ɣef sseḥ, tixxert i yar rray ! akked yar tismin ! D lemtel seg zman aqdim yella, tidet d yiwen,  tanmeẓlant d yiwet myal taluft tela tifrat ; Amdan, ladɣa ilemẓi, yela lebɣi n ubeddel n tegnit deg idammen-is ilmend n ukala immanen i ila. Deg tallit n umdan yettɛeddi-d ɣef ukuẓet n talliyin i yettbeddilen Timant-ines, tamezwarut ticki yella d aqrur, s yin akkin ad yekcem deg tallit send Tilumẓa, s yin akkin ad yekcem deg tilumẓa, seld ad yuɣal d argaz.

Ayen i aɣ-yehman d azal i ila deg tallit-a, gar uqrur akked urgaz ; Deg-s ara nwali ittewlen, tulmisin i ila umdan deg tallit-a. Deg tallit-a n tilumẓa, amdan ila tamuɣli d tamzugt ɣef tudert, ila tamuɣli d tamzug ula ɣef yimdanen i as-d-yezzin, seg wakken i igemmu -ilmend n tfekka-s- yettbeddil ttexmam, d tidet tettlal-d deg-s tulmist n tenmegla ɣer win yellan d ameqqran fell-as, macca tulmist-a ayen i umi semman imusnawen “Tazɣent n Tilumẓa” d tulmist i t-yettaǧǧan ad yefk afud i yiman-is akken ad ibeddel, yetteɛraḍ ad yuɣal d ameqqran ula d netta deg wayen i at-yerzan ladɣa, yetteɛraḍ ad ig leqrar s timad-is i lecɣal-is, tgemmu deg tnefsit-is tikti n ubeddel n wayen yellan yezzi-as-d ; Ticki yufa abrid d imserreḥ, yufa-d awelleh, s wayen i ila d lǧehd akked tefses, tumnem ur yezmir ara ad ibeddel kra ?! Tumnem dakken d imeqqranen kan i umi i kkawen ifadden i izemren ad azlen ɣef kra n ɣawsa, tumnem amɣar yezmer ad yazzel, ad iɛezzer, ad ineɛttab, ad ig myal taluft s yiman-is, war ma yefka-as ḥed afud ?! Tumnem dakken d ameqqran i umi xfif uqerruy wala ilemẓi ?! ass-a d lawan akken ad nebrut i tiktiwin-nni ur nemɛin, tiktiwin i igen miḥyaf gar yiswiren n leɛmer,  d lawan ad d-nger tiɣri i win ilan lǧeh-d ad yazzel, ad isber, ad yerfed taɛkkemt s tebɣest i ila, ass-a yewwi-d ad nebru i leḥqara, ad nefk i yilemẓi tagnit ad d-yessebgen iman-is. Ad kkfuɣ awal s ssut n Lwennas i yennan : « Ahya lweqt ajdid, iyya-d ɣafer-aneɣ, ad nefk i umɣid amḍiq gar-aneɣ ».           

  X.Y