D acu i tenniḍ ?

Sirṭa, D tamanaɣt n yidles Aɛrab !

Adabu n wass-a, ladɣa seg yiseggasen-a ineggura, seg 2007 ɣer wass-a, yufa-d ttawil amaynut s wayes ara yeẓẓu isem akked yidles akked tumast Taɛrabt deg wallaɣ akked wulawen n myal azzayri ; Seg useggas n 2005, lawan i d-tuɣal talwit ɣer wulawen n wid yesɛan ul akked tasa ɣef Tutlayt-nsen akked tumast-nsen, imi tettwasekcem ɣer tmendawt, tuɣal d tutlayt taɣelnawt, ilmend n yidim i yuzlen seg tfekka n waṭas n yimdanen, acḥal d allaɣ yedrewcen seg uxemmem akked useḥseb akked wesḥissef ; Adabu yeseḍfer-as-d, sin kan iseggasen seld-is, deg 2007, s tikti tamaynut ; « Lezzayer, Tamanaɣt n yidles Aɛrab ».

Akken ad siwḍen ad mḥun ayen akk i icudden ɣer yidles Amaziɣ, awanek n wass-a, ijab-d ttawil-a amaynut, ttawil n usekcem n tiktiwin tiɛerbubin ɣer wallaɣen n yizzayriyen -Amaziɣ s umata- ama d amziɣ yeṭṭfen deg tadra-s ama d win yeǧǧan deg nnif-is ad as-tkemmel ad tewɣi allaɣ-is. Tiyita tamezwarut s tikti-a i d-nebder iwsawen, tella-d deg 2007 ; Lezzayer, tamanaɣt n yidles Aɛrab, akken ad d-yibin akter, akken ad uwten ugar idles Amaziɣ, walit s telqey d acu i xedmen, mačči kan d asemres akked uselḥu n lecɣal-nsen war leḥsab akken i nwan kra n yimdanen ; adabu-a yewweḍ almi ixemmem ad ig tameɣra  timeldit i tirmad ara d-yilin ass n 11 deg yennayer 2007… ah, ah… D acu i d-ikeččmen ɣer wallaɣ-nwen ticki twalam azemz-a ?! Wwḍen almi gan ass-a i yettwaḥsaben d iḍ s wayes ara yekcem useggas amynut n leḥsab n Yimaziɣen, akken ad senden ula d nutni ass yecban ass-a ɣer yidles Aɛrab ur nelli d gma-s n yidles Amaziɣ ! Akken ad gen i yal aseggas asmekti n yidles aɛrab deg tmurt ur nelli d ayla-s akken ad yemḥu aẓar amaziɣ. Zemreɣ ad cebheɣ tikti-a « Lezzayer d tamanaɣt n yidles Aɛrab » ɣer tiktiwin-ni n usemmi n yidigan, akken ad ɛerben agdud, macca tikkelt-a wwten-t ɣer wayen yellan d ul, wwten-t ɣer yidles i yellan d agdazal n tumast, rrnu mačči kan agdud azzayri i yettwawten tikkelt-a, macca aggdud amaziɣ anda ma yella yettwawet, terza-t taluft.

Seld tamezwarut-a, deg 2007, atah yettaẓ-d wass akken ad gen i tikkelt tis Snat tirmad-a-nsen, macca tikkelt-a, ad rrnun tiyiti qesḥen ugar akk tid i iɛeddan ; Ass-a ad ttheggin tirmad deg Qsenṭina (Sirṭa), ad as-semmin « Qsenṭina, Ɛasimat ettaqafa El Ɛarabiya », Ahaw ah ! Anwa seg-wen i izemren ad d-yenṭṭeq ?! Ih ih… Ass-a d Sirṭa-nni i yellan d Tamanaɣt n Numidya, d Sirṭa-nni i yellan d Azekka n Urgaz Ameqran i yellan ɣef tikti n zeddi n Numidya, d tamurt n umaziɣ, D Sirṭa-nni  i yellan d ul, d aɣbalu d axxam n yirgazen igeɛmiren deg umezruy n Tmazɣa ; Masinissa, i yenna-an : « Tafriqt i yefriqen » ass-a ad rẓen awal-is i tikkelt taneggarut akken ad ɣbun later-is, ɣas akka mazal Aẓekka-ines ɣer wass-a deg Lxerrub, yeḍleq akken ad steɛfun yiɣsan-is, macca ticki yewweḍ-d wassen-nni deg ara bdunt tirmad-a-nsen wehmeɣ amek ara iḥulfu myal amaziɣ, wehmeɣ amek ara yeqbel ad yeknu, amek ara iqabel azekka argaz-a i d-yeǧǧan Numidya d listar i ugdud-is, tezṛam ay Yimaziɣen n wass-a, deg tallit ideg nekkni nettazal, nettnaɣ ad neg Tamaziɣt d Tutlayt Tunsibt, nutni ttheggin-d tiyitwin ara yesnegren ula d iẓuran-is, ḥsiɣ s wassen deg ara yilint tirmad-a deg Sirṭa s Yiɣsan n Masinissa Ad rmimzen, ḥsiɣ s deɛwessu ara nerfed deg yirawen-nneɣ i lebda imi nebra i wayen akk ɣlayen fell-aɣ, imi nebra i ṭṭbel deg waman ! Ay Imaziɣen n wass-a, xemmemt i uzekka deg ara d-yaweḍ wass deg ara nemmager lejdud-nneɣ ; s wacu ara asen-nesfukkel faccal-nneɣ… ?! “Ayen iyi-qerḥen nniɣ-t-id, nekk i lebda ad geɣ tiɣri, i kečč ay agdud ma ad d-takkiḍ ”                                            X.Y