D acu i tenniḍ ?

Yekfa umciwer kan ad texsi temasalt ?

         Iḍeli i d ass aneggaru n umuqel ɣaf uɛiwed n kra n waggazen deg Tmendawt n tmurt-nneɣ, ass-a aneggaru deg ara yekfu umcawer gar Ḥ. Uyeḥya akked yiqqerray yemgaradeg yellan assaɣ akked uẓayar asertan deg tmurt. Akken neẓra tuget n wid i yemcawaren akked yid-s sutren Ad tili Tmaziɣt d tutlayt taɣelnawt Tunsibt ; ayadra, ma rran deg tidmi-nsen tamsalt-agi ? Ayadra, ma mazal ad d-ḥessen i ugdud i tt-yessuturen seg wacḥal n lesnin ay ? Ayadra, ma mazal ad d-llin imeẓẓuɣen-nsen akken ad aɣ-d-ḥessen neɣ yekfa umcawer, tura yeggra-d kan rray-nsen ad iɛeddi ?

Ma nsedda-d aggur-a, ad d-naf mi nekfa leḥsab, mazal-as semmus n wagguren i wakken ad d-yaweḍ waggur n Duwenber, agur deg ara tbedd tmendawt tamaynut, yettwaseɣtin, yettwaɛaden ilmend n yimenzayen yerzan agdud akked waddad aserti swayes tleḥḥu tmurt s umata ; agur-a i yettraǧǧu myal d amaziɣ am waggur-nni n Lɛid, aggur deg ara d-iban leqrar n Tmaziɣt, d tumast, d tutlayt tunsibt ; leqrar ara as-igen azal tla deg tidet neɣ ad tt-ɣbun i tikelt taneggarut ; maca ur umineɣ d tis snat ara ad d-yeḍrun imi agdud akk ass-a yeẓra, llint wallen-is ɣaf wayen yerzan aẓaris akked yizerfan-is, d awezɣi ad yessusem s dat n win ara isefḍen later-is. Tella yiwen n taluft kan terḥa allaɣ n win akk i as-yeslan ; Ikabaren-a isertanen i yessutren ass-a Tamaziɣt d acu i yeddewiren deg wallaɣ-nsen ? Qqimen almi d ass-a kan umnen s Tmaziɣt, neɣ d awal kan ikecmen deg tarrayin tisertiyin n uksab n wul n yimdanen ? ma d tidet ad ḍefren ayen i d-nnan seld mi kfant lemcawrat-a neɣ dayen sawḍen ad gen tasertit-nsen n uksab n wulawen, yekfa ccɣel-nsen, nekk cukteɣ mačči kfant kan lemcawrat ass-a, d ayen yekfa usuter n yizerfan ; ma yella tbeddel tmendawt azekka, yekfa ɣef ugdud uḥebber, yeggra-d fell-as ad yeḍfer kan ayen yellan deg udlis-nni aḥcayci ?! Asuter n yizerfan ladɣa Tamaziɣt i aɣ-yehman ass-a, ɣas kfant lemcawrat, mazal yewwi-d ad nsuɣ yes-s, ad nessuɣ amek i d-yewwi ad tili, ɣas nutni ɣelqen imeẓẓuɣen-nsen seld mi ara kfun aciwer, nekkni ad ttenḥettem fell-asen ; deg tidet, Tamaziɣt ur d-teggri ara deg uciwer ma ad tili neɣ xaṭi, ahat yewwi-d ad meslayen ɣaf yizerfan-nniḍen ma ad ten-id-skeflen, Tamaziɣt ulac fell-as aɛelleq n leḥruz, tettwaḥettem fell-asen ad tili d TUNSIBT akked TUMAST, awalen-a i irefden tinaktiwin ur yezmir yiwen ad yeḥsu aṭṭkul i lan. « Nekk ayen i y-iqerḥen nniɣ-t-id, i lebda ad geɣ tiɣri, i kečč ay agdud ma ad d-takkiḍ ? »    X.Y