Deg wass n lexmis yezrin, 28 deg nuber Amni n Lurup yesbedd taneɣtust ɣef waddad n tlelli deg lezzayer.

Deg weḍris ɣef buṭan tuget n yiɛeggalen n Umni-a tella-d teẓiṛt ɣef wabaẓ i iga udabu azzayri mgal imeɣnasen d-yefɣen ɣer ubrid neɣ wid yessawalen s tlelli s umata.

Akken yettwaru deg uḍris-a, Umni "inekked abaẓ arsaḍuf (Illégal), aḥebbus, akked usimes akked ẓedmat i d-yellan ɣef yimeɣnasen, ɣef yinmalayen, ibugaṭuten, inelmaden, imḥaddiyen n yizerfan n umdan,akked umdan anmetti s umata. Daɣen ɣef yimesbaniyen imelwiyen i yettekkin deg tmesbaniyin n Lḥirak".

Deg uɣmis n le Point afransis, yura-d ɣef wadda-a ila Umni n Lurup, yurra, "Asuter i udabu azzayri tesriḥ amiran s war tiwetlin i myal win yettwaḥebsen ɣef dra n usemres ines i wezref n usenfali s tlelli". Deg deg i d-yuder ismawen, akka am : Hakim Addad, Abdelouahab Fersaoui, Massinissa Aissous, Djalal Mokrani, Ahmed Bouider, Kamel Ould Ouali, Karim Boutata, Ahcene Kadi, Wafi Tigrine, Khireddine Medjani, Samir Belarbi, Karim Tabbou, Fodil Boumala, Lakhdar Bouregaa et Samira Messouci.

 

Mustapha Bouchachi yemmeslay-d ass-nni lǧemɛa deg tmesbanit tis 41 deg was n 29 nuber 2019, ɣef waddad-a iga Umni n Lurup, yenna : "D tamsalt n daxel, yerzan Lezzayer, ad tt-nefru gar-aneɣ. Agdud ad yettkel ɣef warraw-is akken ad yessiweḍ". D awezɣi teḍra deg ddunit anda tamurt taberranit tellul agdud deg ibeddi n tlelli s tidet". Bouchachi, yerna-d deg wawal-is, imi yerra llum ɣef udabu azzayri imi d aneggaru-a i yezware, yefka tiktiwin i lberrani ɣef taluft yerzan tamurt. Deg wawal-is, Bouchachi, yenna : "yewwièd ad d-iniɣ, deg yiwen wakud, belli anagraw, s uɛeṛṛuḍ ad yefk ṛabul i tmura  tiberraniyin, d netta i yezwaren yefka-asent ixef lxiḍ..." Deg tikti n Bouchachi, limer anagraw ur yessufeɣ ara lbaḍna n tmurt ɣer lberrani, wamma tineggura-a, ur ḥessunt ara swayen yeḍran sdaxel. Dima deg yimi n umdan-a yellan tazrirt deg tmesbaniyin n LḤIRAK, yeḥres ɣef useḍlem n unagraw azzayri i yellan d sebba, s ṛabulat i iga, s tigawin iga, s leqher, akked uḥebus n yimeɣnasen yettnaɣen ɣef tlelli akked tdimuqratit.

War ccek, Mass Bouchachi, yettmeɛin-d ɣef USELWAY n leɛḍil Abdelkader Bensalah i yessutren aselway n Rus Vladimir Poutine.

Soufiane Djilali deg twitter, yura-d " aseqdec n LḤIRAK n yizzayriyen sɣur iɛeggalen n Umni n Lurup, yella deg lebɣi n uksab n wul n wid yettbuṭin fell-asen", yerna-d " yettwabel umḥaddi n yegduden gar-asen, maca maci awid kan ", akken ad yessaweḍ Soufiane Djilali tikti-s tagejdant, ikemmel-d "ma tebɣa Lurup ad s tidet ad tallel Lezzayer, yewwi-d ad tallel deg tigawt n tririt n tedrimt yettwakkren".

 

Deg ufares n Umni Azzayri 

Deg wulɣu n unagraw aɣelnaw n tigdud, yettwasummel ɣef unekcum deg lecɣal n daxel n tmurt, yettwaḥsab d acirci n ugdud azzayri. Deg ulɣu-a yenna belli akeččum-a deg lecɣal n tmurt, yusa-d deg tallit anda agdud azzayri yettheggi ad iɛeddi ɣer tefranin send leɛtab meqren, akked leqdic ameqran i iga yigen aɣelnaw. Aya ur yelli wara s niya yelhan n Umni n Lurup.

Ɣer yiḍ, yerna-d uqerruy ɣef udabu aɛlayen n yigen iwekked belli lezzayer ur tqebbel ara ula d yiwen ad d-yekcem deg lecɣal n tmurt. Iwekked-d, yenneḍ-d awal "ula d yiwen, wa ad s-d-nḍeɣ, ula d yiwen ur yettwaqbal ara ad d-yekcem deg tlufa yerzan tamurt".

 

Ɣer Ugdud Azzayri

Amḥaddi akked ibeddi mgal, addad i yerfed Umni n Lurup, yella-d ula ɣer yimeɣnasen deg tmesbaniyin. Aya ur yessewham ara, imi seg zik, ladɣa seg mi bdant tmesbaniyin i wumi semman LḤIRAK neɣ amussu n uslelli, deg 22 deg yebrir, nettwali yerna n sel i tenfaliyin mgal unekcum n tmura tiberraniyin deg lecɣal n tmurt, ladɣa mgal tamurt n Fransa, akked tmura n usamar alemmas.

Dima asenfali i d-yettuɣalen s tuget "Tamsalt teɛna kan agdud azzayri. D tamsalt n daxel ad teqqim sdaxel". ladɣa deg yisenfalen iwehhan ɣer uselway n Fransa qqaren-as "tamsalt n lezzayer d tamsalt n yiɛeggalen n yiwet n twacult, ur nesteḥqa ara aberrani".

Imesbaniyen ur ǧǧin ara ula d anagraw azzayri sḍelment akken i d-nenna yakan deg ray n mass Bouchachi. Aṭas deg yimesbaniyen i yettwalin ; sebba d anagraw i yettattren tallelt deg tmura lberrani.

 

X.Y