Tussna i yeswasuddsen gar tugnatin n tutlayt, tekka-d ɣaf Kraḍet n talliyin yettemseḍfaren, uqbel ad tessiweḍ ad tissin iswi ussnan »[1].

Deg tazwara tella d Tajerrumt tansayt i yeṭfen annar n tezrawt n tutlayt, tazrawt-a i yesbedden ansayen-is akked yimenzayen-is ɣef tmezzult (logique) i yefɣen ɣef tmuɣli tusnant n wass-a, ur tlethi ara d tutlayt akken yella lḥal-is ; deg yiswi-s d asuḍef d usbeddi n yilugan i d-tferreḍ nettat ɣef tutlayt amek i d-yewwi ad tili, akken daɣen seg tama i d-tletha siwa d tutlayt ilan iseɣ akked ccan, war ma terra deg tidmi-s tutlayin n yiɣerfan addayen. Ɣer yiseggasen n 1977 i d-iban yiwen ubrid-nniḍen i d-ilethan d tezrawt n tutlayt win i umi qqaren « La Philologie », irem-a i yellan ila assaɣ akked tmuɣliwin  akked teẓẓra n Friedrich August Wolf, abrid-a daɣen ur d-iletha ara akked tutlayt i yiman-is, iletha akked usuḍef akked umsasi, akked umezruy aseklan ; akken i tletha d usedwen ɣef yeḍrisen, tessemras asezɣen deg tarrayt-is taẓrayant, akken i tesserwas gar tutlayin akked yeḍrisen yemgaraden ; deg udlis timsirine n Tesnilest Tamatut ; yurra : « deg leqdicat n Ritchl ɣef Plaute zemren ad ttwasemmin Tasnilest ; maca mgaraden deg taɣult-a, tazɣent Tafilologit temgarad deg yiwen waggaz : tettcud s waṭas ɣar tutlayt yuran, t-tettu tutlayt n tidet »[3].

S yin akkin, tban-d tallit tis Kraḍet, anda i d-tlul tesnilest tamatut ɣef ufus n Ferdinand de Saussure[4], aneggaru-a yemmut uqbel ad d-yeffeɣ udlis yersen ɣef yisem-is, d sin n yinelmaden-is –Ch. Bally akked  Hb. Sechehy- i t-id-yessufɣen imi i d-gemren akked wayen i asen-yesɣer ; wid i igan ccan i wayen akk i asen-yesselmed, s tiktiwin-is ɣef tusna akked tezrawt n tutlayt amek i d-yewwi ad tili ; deg teẓra i d-yewwi  Saussure ɣaf tesnilest ; asemgired-ines ɣef Tjerrumt tansayt akked Tfilulujit s usbeddi-s i yeswi agejdan n Tesnilest, ɣur-s, netta, « Tasnilest d tazrawt n tutlayt i tutlayt s tutlayt s timmad-is »[5], s yin akkin, akken ad tt-yessemgired ɣef teẓra Tafilulujit i d-nenna tesserwas gar tutlayt akked tayeḍ, akken daɣen i tletha d tezrawt tamezruyant n tutlayin s tarrayt tazgerkudt ; F. de Saussure yerna-d tarrayt i umi isema Tayenkudt, yes-s ad yezru tutlayt s tutlayt i tutlayt s timad-is deg yiwen n wakud deg yiwet n tallit yettwaɛiynen.

Deg wayen yessemgarden Tasnilest ɣaf tezrawin-nniḍen n tutlayt i tt-id-yezwren, ad naf daɣen tasnilest tletha-d d uglam n tayunin yellan deg unagraw utlayan, imi ɣur Saussure « Tutlayt d anagraw n tayunin i yettemsemmaden deg way-gar-asent »[6] . Ihi  d aglam-a  swayes i d-yewsef tutlayt i as-yefkan isem n Tesnilest tuddsant, deg yittewlen akked tulmisin-is : aglam n tutlayt i tutlayt s timad-is ; aglam n tutlayt akked tayunin-is s littkal ɣaf tmuɣli akked tamawt ; Tasnilest ur tli ara asenned ɣer kra n tutlayt naɣ ɣar kra n yilugan yettḥettimen ɣaf tutlayt amek ara tili ; Tasnilest ur teqqar ara wagi yecbeḥ, wagi yecmet. Akken yenna André Martinet deg udlis-is : « Ccbaḥa ur telli ara tɣawsa, maca deg usizrer n unterras ɣar tɣawsa »[7].

Ɣer tagara yewwi-d ad necfu naɣ ad negzu belli Tasnilest deg tidet tla leɛmer yettuɣal ɣar yimagraden imezwura i d-igelmen tutlayt, maca tella tettwaɣlab s kra n tuṭfafust (préoccupation) akka am tesreḍt, tasnazreft, tafelsafit…  Maca Tasnilest i d-yewwi Saussure temgarad, tewwi timunent ɣaf tussniwin-nniḍen, akken daɣen i d-yesbed iswi amatu n tezrawt akked yiferdisen n tezrawt.

Aggazen igejdanen ɣaf yebna Saussure Tasnilest :

A)  Tasnilest d tusna taglamant :

Deg-s yesbadu-d « Tutlayt d anagraw n tayunin yettemsemmaden deg way-gar-asent » (Cf, 02), ɣur-s tasnilest yewwi-d ad tezrew tutlayt ilmend n wayen tella deg tidett-is, d aglam n tayunin-is war ma yesnulfa-d umnadi, war ma yesluggen amek i ilaq ad tili ; deg yiswi-s amezwaru, d tamawt ara yer ɣaf wamek i tga tutlayt d wamek i tleḥḥu.

         

b)    Tamawt ɣaf Timawit send Tira :

D tanmegla ɣaf Tjerrumt tansayt, Tasnilest tefka azal ameqqran deg tezrawt-is akked yimenzayen-is i tutlayt deg uswir n timawit imi deg tidmi-s tutlayt tettwagsusru send ad tettwaru.

 

c)      Iswi n Tezrawt Tasnilsit :

Tasnilest i d-yewwi Saussure temgarad deg yiswi-s tussniwin timezwura yerzan tutlayt ; Tasnilest iswi-s agejdan « d azraw n tutlayt s tutlayt i tutlayt s timad-is » (Cf.02).

 

(Yettkemmil...)

Y.X

 

  



[1] Cour de la linguistique Générale, édition TALANTIKIT, Bejaia, 2002 : « La science qui s’est constituée autours des faits de langue a passé par trois phases successives avant de reconnaître quel est son véritable et unique objet » Asebter 05.

[3] Cour de la linguistique Générale, édition TALANTIKIT, Bejaia, 2002 : « Les traveaux de Ritchl sur Plaute peuvent être appelés linguistiques ; mais dans ce domaine, la critique Philologique est en défaut sur un point : elle s’attache trop servilement à la langue écrite et oublie la langue véritable...» Asebter 06.

[4] Yettwaḥsab d ababat n Tesnilest tuddsant i yemgadalen ɣef tjerrumt tansayt akked tfilulujit.

[5] Cour de la linguistique Générale.

[6] Cour de la linguistique Générale.

[7] André Martinet ; Le Français sans Fard, 1974 : « La beauté n’est pas dans l’objet mais dans la réaction de l’individu ver l’objet »