Akken ad d-yefk, neɣ ad d-ig deg yiwen ufrag isental n tezraw tasnilsit, F. d Saussure yesken-aɣ-d dakken tutlayt d anagraw n tayunin, tayunin-a ttemsemmadent, yal yiwet nettisin-itt s userwes-ines d tayeḍ daxxel n unagraw-a, seg tama-nniḍen yessaweḍ Saussure ad yessemgired ger snat n tesnilsin :

  •  Tasnilest tandaxelt : Icig-a deg tesnilest izerew ayen yerzan tutlayt s timmad-is, war ma yemmuqel ɣer wayen i as-d-yezzin, d tazrawt tandaxelt, tletha kan d unagraw utlayan, d aglam n wassaɣen yellan gar tayunin n unagraw utlayan-nni yakan, d anadi ɣef yilugan ɣef tebna tutlayt d wassaɣen n tayunin[1].

 

  • Tasnilest tanveṛṛa : icig-a deg tesnilest ilethu d wayen yellan veṛṛa i unagraw utlayan, macci d taɣessa n tutlayt i izerew maca izerew ayen i as-d-yezzin d wayen i izemren ad ili tazrir ɣef tutlayt, amedya : Tasertit, Amezruy, Timetti, aserwes d unadi ɣêf wassaɣen n tutlayin deg waygar-asent…

 

         Ihi ilmend n waya tessaweḍ tesnilest ad takez isental n tezrawt-is, ilmend n veṭṭu-a, ivan-as-d wayen i terza tezrawt-is :

ilmend n tesnilest tanveṛṛa tasnilest ad tezrew, ad d-teglem amezruy n tutlayin, ad tezrew assaɣ i yellan gar tutlayin, aserwes gar tayunin-nsent, tamuɣli ɣef tussniwin i as-d-yezzin d tezrirt i yezmer ad ilint fell-as, akka am tsertit, tunzut, tasnakfust…

Ilmend n tesnilest tandaxel, tasnilest tra ad d-tezrew ilugan s wayes vnant tutlayin, d wassaɣen i yezdin tayunin-is deg unagraw utlayan, aglam n tutlayt i tutlayt s tutlayt s timad-is.             

 

Tamawt : Tasnilest tamatut, tettnadi ad d-teglem yerna ad d-tessegzi amek tevna tutlayt, maca wergin tettnadi ad tesluggen tutlayt.

Yettkemmil...

X.Y



[1] Andi ɣaf yilugan iɣef tevna tutlayt, mačči kif-kif akked tjerrumt tansayt i yettnadin ad d-teslugen Tutlayt.