Nuli-d tasawent temmuger-aɣ-d teksart, anaɣuṛ, amɣud icuban taguyt, yettbin-aɣ-d, ur nebɛid ara aṭas. Imdanen ttemfaṛaqen yiwen ɣef yeffus wayeḍ ɣef zelmeḍ amzun d iweṭfen i wumi tesxerbeḍ abrid ! Ayen i d-yettaččaren allen d dduxan i d-yettalin maca ur yettaɛlay ara am win n tmes ! Ulac times yakan.  D tagut, mačči d tagut ? Azal qaylil deg wayur n yebrir !

Ikamyunen izegzawen ttwasetfen am lxiḍ deg tama-nni akkina, medlen-d abrid, ɣer sdat llant azal n ukuẓet tkersin n temsutla, tigi nessen-itent mačči am yikamyunen izegzawen i d-imedlen abrid. Nekkni deg kraḍ yidneɣ neḥbes ur nuẓa wara ɣer sdat nnig wakka, imi yettbin texleḍ, imdanen ttsuɣun  “llan la CRS”, aṭas i jemɛen !

[...]

Mgal uggug-a i d-yefɣen mgal tikli-nneɣ, aṭas deg-neɣ ur d-nwin wara ad ti-d-affen. Nekk d yimdukal-iw, nɛuned wid-nni yettsamin iɣallen n laman udem ɣer wudem, newweḍ almi d asurif aneggaru. Ḥulfaɣ am akken yiwen ur yelli yid-neɣ neɣ am akken nemyeɛraq ! Ixef-iw ur iyi-d-yettmeslay ara s yisem n ugraw akka am sgelli, ixef-iw yeɛreq yerna yesseɛreq-iyi yid-s, am win ikecmen ɣer tudert tis snat ! Akkud ibeddel tikli, teɣli-d tiɛuẓẓegt ala kra n leswat i selleɣ yerna ur ferzeɣ ara deg-sen acemma, allen-iw ceɛlent, ttwaliɣ tigawin ttɛeddayent s taẓayt ; walaɣ Kamal amek yezzi s waɛrur i yiɣallen n laman s littkal d war tugdi, yiwen ufus deg yigenni aqemmuc-is yeldi urɛad ad mlilen yicenfiren-is ad yuɣal ad yeldi imi-s i tikkelt-nniḍen, iẓuran n temgerṭ-is fɣen-d uffen ad d-tiniḍ ad ṭṭreḍqen, allen-is ur tteqmacent ara ula d tikkelt...

X.Y