Tanekra n Tumast, Tanekra n Yiseɣ, Tanekra mgal Tamḥeqranit d Ddɣel. Tanekra Mgal Tiɛurbebt i yedlen aɣref “Amaziɣ”. Tanekra-a ɣas ulama aṭas i tt-yettwalin d tumast tamaziɣt, maca deg tidet d agdud Aqvayli kan i yuklalen tajmilt ɣef umennuɣ i d-yewwi akken ad ibedd mgal taduli iga udabu n Lezzayer ɣef tumast n tefriqt ugafa, ladɣa deg tnekra n 2001.

Deg wass n 18 deg Yebrir, imsutla Imhersanen jebden ɣef yiwen n yilemẓi s rrṣas sin wussan send asfuggel n 20 deg Yebrir umi nessawal Tafsut imaziɣen. Germaḥ Massinissa, Ilemzi yeqqaren deg tesnawit, yessufeɣ tarwiḥt deg ssbiṭer deg Tmanaɣt n Lezzayer.

Tinekriwin bdant deg mayal tiɣmert deg tmurt Taqvaylit, anda iqvayliyen llan wejden yakan i usfuggel n 20 deg yebrir, dɣa timenɣiwt n yilemẓi-a s ddɣel war tawtilt ibanen ɣer wass-a, teǧǧa tinekriwin ad imɣurent, yerna ttemhazent ugar.

 

Adabu n Lezzayer, ur d-yeclig ara deg lɣiḍ n yiqvayliyen, ur d-yefki wara tameẓẓuɣt am yal tikkelt deg ara d-yili leqher ɣef ugdud-a i yuklalen iseɣ d ccan, ladɣa deg yiseggasen yezrin, anda myal tikkelt adabu yessebgan-d miḥyaf i d-yesseɣlay ɣef temnaṭ n leqvayel. Deg ṛabul n Uneɣlaf n ddaxel, uran belli Massinissa ur yelli wara d anelmad, ma d Aneɣlaf n Tɣawsiwin n ddaxel, Yazid Zerhouni, yenna fell-as d “Avwayu” ! Kra dagi akk seddaw n tsusmi n Uselway n Lezzayer A. Bouteflika i yellan deg tallit-nni irebba cceḥna d tameqqrant ɣef yiqbayliyen, seg tama ilmend n lvuṭ I yugin ad ttekkin deg-s yiqvayliyen deg 1999 (tamsalt n lvuṭ n yeqbayliyen, ur tekkin ara deg-s seg mi d-tewwi timunnent Lezzayer ɣef Fransa), seg tama nniḍen, aneggaru-a yugem-d seg tiktiwin n Uselway aqdim n Lezzayer, H. Boumediene , anda i yella netta deg tallit-nni d aneɣlaf n tɣawsiwin n Berra.

Tanekra n yiqvayliyen deg Yebrir 2001 d tidet tella-d ilmend n tmenɣiwt n yilemẓi sɣur iɣallen n laman, maca d timentelt kan, imi lɣiḍ n yeqbayliyen akken i d-nenna, yettuɣal ɣer tlufa yezrin, aṭas n leǧǧruḥ i d-yessexlef udabu amhersan ɣef tmurt Taqvaylit. War ma nezzi aṭas ɣer deffir deg umezruy, seg Timunent n Lezzayer ɣer 2001 mayal udem n miḥyaf (ayen i ikemlen ula ɣer wass-a). Seg yinawen n Uselway Amezwaru A. Ben Bella “i yennan isem n uqvayli ur t-ǧǧiɣ”[1], ɣer Uselway Boumediene ur yettkukrun ara ad tt-id-ifak deg yinawen-is i ugdud azzayri i  yesɛurbeb belli “Tamnaṭ n Leqvayel, d tamsirit, d imdanen umi d-yewwi ad nbeddel ssira...” nnig n waya, Boumediene yessaweḍ s yigen ad yemdel ula d imawen n yemdanen, yegdel fell-asen ula d tameslayt s teqvaylit, ɣef wakken i d-ttalsen, ssawḍen ula deg tuddar, ttaggaden yemdanen ad meslayen s tutlayt-nsen tayemat. Tasnakta-a umi yebra Boumediene deg uɣref n Lezzayer, teǧǧa agdud akken ma yella ad yesegmu dɣel d miḥyaf magal Iqvayliyen. Seld aneggaru-a, Sulin-d Wayeḍ, Chadli Benjedid, aknaner n yigen n Lezzayer, i d-yetturebban daɣen ɣef ufus n Boumediene, seddaw n Chadli Benjedid i d-ḍrant tedyanin n 80, tidyanin n “tefsut imaziɣen”, seddaw n leḥkem n Chadli i tuɛeddan yiserdasen, ama d imsulta ama d imsutla ɣef tseddawiyin deg Tmurt n Taqvaylit, igen yessaweḍ yekcem ula d timezduɣin n yisdawanen, anda tuɛeddan ula ɣef tnelmadin d yinelmaden, rnu yeḍfer tikli n win i t-yezwaren, anda sekra n win i ṭṭfen, ya ad temḥun s lekmal, neɣ ad d-yeggri deg lḥebs, leḥbs icuban lumbaz, anda i tenɛettben, yerna serfufnen-ten... Tikli n Chadli mgal iqvayliyen, ur temgarad ara s waṭas ɣef tin n Boumediene, imi ineggura-a, ur ttkukrun ara ad d-ssufɣen iqjan-nsen ad hemjen, ad jerḥen, yerna ad nɣen war ma yenna-asen yiwen ayen i tgam akka, ini-asen kan d aqvayli (ccah deg-s). Ula d Ameɣras Kamal Amzal i yinɣa Bu-Ččamar, seld mi as-ḥekmen n 6 n yiseggasen n lḥebs, Aselwa Chadli, yesmeḥ-as 3 n yiseggasen yessufeɣ-it-id. Seddaw n udabu n Chadli i tuɛeddan s rrṣas ɣef Ucennay Amḥaddi Matub Lwennas deg 1988, anda i yemneɛ seg tmettan. Akken ad nekfu awal ur nkeffu ɣef uselway-a, ur nezmir ara ad nwet nneḥ ɣef ubrid i yeldi ɣer usemar alemmas, anda yeldi abrid i tiwɣi n yidles d tesnakta n usamar alemmas, s tiɛurbebt d tineslemt, ad d-teglu s timundelt i ugdud Azayri akken ma yella, yewwi-aɣ-d imasriyen, d ifalastiniyen,  d yiselmaden nniḍen seg tmura n usamar ur neẓri wara ula ma lan ula d agerdas deg tanga i sɣarayen, yerna yewwi-d lecyax amedya, El Karadaoui d Mohamed Al Ghazali akken, ad aɣ-d-ftun deg tiliẓri, i yekkfan ɣer tagara deg ugar n 10 n yiseggasen n yidammen, anda iqelwacen i yuɣalen d iwaɣezniwen neqqen s yisem n tesreṭ, yerna anda tuget n wid yettwanɣan d imusnawen iqvayliyen (yal yiwen s yisem-is)...Send timzizelt-a ɣer usizzel n yidammen, igen n Lezzayer, yessaweḍ ad iqenneɛ yiwen wudem ameqran n ṭrad mgal Fransa, ad d-ibedd d aselway ɣef Lezzayer seld mi yettwagdal ukala n tefranin 1992, M. Boudiaf, ur ǧǧin ara ad yeqdec nnig n 6 wayurren...

Seld mi seglalzen Boudiaf sdat n wallen n yizzayriyen, ibed-d Ali Kafi seg leɛḍil, azal n 2 n yiseggasen, maca aneggaru-a am wiyaḍ, ila tamuɣli ur nesfi wara ɣef leqvayel, yessaweḍ almi d-iwet deg Abban Remdan, deg udlis-ines ! Ɣef wakken yenna Said Sadi, Ali Kafi ur yeḥḍiren ara i unejmuɛ n ugraw n Sumam amek yessaweḍ ad d-iwet s leqseḥ deg Abbane Remdane, ayen i d-yessebganen, dɣel i ila ɣer yiqvayliyen.

 Seld Aneggaru-a, ssulin-d Liamine Zéroual s uswir n tredwazt i ila, yella deg uswir aɛlayan deg yigen n Lezzayer, akka am tuget n yiselwayen yezrin, ur yessin ad yessemgired ula deg ukabar d tiktiwin tisertiyin i yellan, yetturebba-d deg yigen, aɣbel-is d leslaḥ, d umennuɣ, ladɣa deg talli-d deg i t-id-sbedden, yettwasnen s rrebrab i ileqḍen sekra n win ilan ixef n tusna deg tfexrurin-is ; akken i d-nerra lwelha yakan, aṭas n yiqvaliyen ama d ineɣmasen, ama d imeɣnasen ula d iɣarimen, ruḥen am tadla yečča yilef...Aya nezmer ad d-nini yerza Lezzayer s umata s ddaw n Leḥkem n Zéroual, maca ayen i d-yessebganen belli aneggaru-a ur d-yenḥerw ara deg yidammen n uqvayli, d TIMENƔIWT N MATUB LWENNAS, ɣas ulama tamurt taqvaylit temceggal, teffeɣ-d ɣer ubrid akken ad d-tessebyen lɣiḍ-is, maca Zéroual, ur t-id-yuli wara ula d awal, nnig waya deg wass-nni yakan iɛedda-d deg tiliẓri taɣenawt n Lezzayer yettezmumug s tumert.

Zéroual ur yessinen ara amek ara iselḥu tamurt, yettuḥettem fell-as akken ad ibru i umkan-is akken igen ad d-isewjed yiwen n uselway aneggaru ara yawin tamurt ɣer ṭrad n trebbuyaɛ n udabu, ayen i yeǧǧan tamurt n Lezzayer ad tekcem deg win yufan iɣeẓ-itt ; A. Bouteflika.

War ma nekcem ɣer yiɣeblan ɣur yessaweḍ Tamurt n Lezzayer, Bouteflika, ila ddɣel ugar weyaḍ akk ɣef ugdud aqvayli, Bouteflika, ila-tt d yeqvayliyen seg ṭrad magal Fransa, syin seg temettant n Boumediene mi yeḍmeɛ ad yuɣal d aselway, s yin akkin deg usbeddi-ines deg 1999 iqvayliyen am yal tikkelt ur vuṭin ara, gguman ad ttekkin deg tefranin, ula deg tirza-s ar Tizi Wezzu (anda i d-wwin wid ara as-iḥessen deg lkiran seg waɣiren nniḍen), yenna deg yinaw-ines “seg tura d assawen, ur yettili wannay amaziɣ, usiɣ-d ɣer da akken ad awen-sexsiɣ tacuffet-nwen, ma yela, ad d-wekdeɣ akken iwata, ma yella tamaziɣt-a yewwi-d ad tili d tutlayt taɣenawt, d awezɣi ad tili d tutlayt tunsibt, d awezɣi ad tili d tunsibt !Bouteflika ira ad isexsi tacufet n yiqvayliyen, ira ad ten-yesket i tikkelt taneggarut akken ur ttezzir ad d-gsusrun awal, d acqirew i d-ira i yiqvayliyen, ira iman-is d zzaɛim, yetɣebbel ucuf deg yidmaren-is ɣas ulama ur ten-ili wara, maca yessen ad yeddez afus-is ɣef ṭṭavla imi yettkel ɣef yigen i t-id-isbedden. Bouteflika d Taqacuct n leqher d ddɣel, war tilas i d-yesseɣli miḥyaf, urɛad ibedd d aselway, ira ad d-yer tamurt taqvaylit s ddaw iḍarren-is, imi yeḥsa d akken ma yessaweḍ yeskulla iqvayliyen, ur yettɛawad ad d-yettwabder yisem n tumast tamaziɣt deg wakal n Lezzayer. Bouteflika ayen i d-nenna fell-as drus, yessebyen-d war cceḥa belli ur yettkukru wara akken ad ig tamhersa ɣef tmurt taqvaylit i yefɣen afus i myal adabu i yezrin. Maca ur iɛeṭṭel ara lḥal akken iqvayliyen ad rrẓen awal-is, ad refden acqirew i asen-d-iga deg yinaw ines deg Tizi di 1999.

 

Ad d-nezzi ɣef usentel n tazwara, tanekkra n Tumast, Tanekra n Yebrir 2001, war ma nulles-d awal ɣef tmentelt tagejdant n tnekra, ad d-nalles ɣef wacu i d-yekker uqvayli akken ad d-yini d akken yella yernu mazal ad yili, ad ibedd udem d wudem d yiɣallen i yettmettilen adabu Lezzayer i d-iceggɛen ineggura-a akken ad gen lbaṭel deg tuddar, anda ssawḍen deg yiseggasen yezrin ad keccmen ula ɣer yexxamen n yergazen, llant tamiwin deg tmurt n Leqvayel anda imsutla mi kecmen ɣer tḥanut ad refden ad fɣen war ma xelsen ayen i ččan... Deg waṭas n tikwal anda d-ẓedmen ɣer tdukliwin tidelsanin akken ad ḥebsent tirmudin i d-swejden i kra ma yella d leqdic adelsan (amennuɣ n tdukliwin tidelsanin i uḥraz n yidles aqvayli, d umennuɣ ɣef tumast d win iǧehden aṭas, i yeǧǧan ɣer wass-a ur inegger ara uɣref d tumast n tefriqt ugafa). Aǧadermi, i yewten acennay Lwennas, am win i yewten akk iqvayliyen deg myal tikkelt ara ad afen-tagnit akken ad t-seglilzen, yiwen ur as-yeqqar ayen tgiḍ aya, aṭas i umi d-ksen accaren umi d-qelɛen imeẓẓuɣen, umi tuɛeddan ɣef lḥerma-nsen sdaxel n leḥbusat ɣur garen imeɣnasen yettemḥadin ɣef tumast. Ma telliḍ d aqvayli, ilaq ad teṭṭfeḍ imi-k ulac ad k-dzen aɣesmar-ik, ma telliḍ d aqvayli, ečč ɣrum-ik tessusmeḍ ma ulac ad k-yettwikkes umkan-ik deg lxedma, ma ulac ad ak-yettwikkes usinag-ik akken ur tregleḍ ara ula ɣer tmura n lberrani, ma ulac ad k-yettwikkes uzerf-ik, s umata, ma ur d-teggriḍ ara deg leḥbusat...

 

Tin izaden deg-sent, Agdud n Lezzayer i yefɣen i tmurt Taqvaylit, yedda deg tiktiwin n udabu, yerfed tasnakta-s, iger-as irebbi iɛuz-itt ; ula d aneggaru-a, ireggem deg uqvayli ɣer wass-a, ula isem ur as-fkin ara, seg uḥerki ɣer cmata, seg cmata ɣer ikufriyen, seg ikufriyen ɣer wuwday (Yahud), seg Wuwday ɣer Zwaf, seg zwaf wissen ɣer wacu ara d-snulfun ɣer sdat... agdud n Lezzayer, myal tikkelt deg ara yebru uqvayli i yimeẓẓuɣen-is, ad yenwu d atmaten i yecrek yiwen umezruy ama d aqvur ama d atrar, aneggaru-a ad d-yeffeɣ s wudem nniḍen, ad yezzi aɛrur i lḥeq akken i t-yecna Lwennas, tagmat d ugdud yettɛuzzun tiggawin d tarayin i iteg udabu i tmerẓiwt n uqvayli tban kan akka d tikerkas... Ayen yeḍran deg tikli n tumast d tikli n yiseɣ, deg wass aɣenaw n uɣlan aqvayli deg 14 Yunyu 2001, deg tikli tameqqrant deg i d-guggen yeqvayliyen akken ad siwḍen tiɣri n umennuɣ ɣef tumast ɣer tmannaɣt n Lezzayer, anda Agdud azzayri i iterfren deffir n yiɣallen n laman neɣ i d-yettbeddaden seg yibalkuten, ttekkan deg tmerẓiwt d tyitwin n yimesbaniyen ; agdud n Lezzayer ur tt-yeǧǧi wara kan d tikti deg wallaɣ-is maca iga-tt d tigawt, ur yekkat ara kan s wawal maca yettekki ula s ufus-is, anda i d-senɣalen ula d aman neɣ zzit yerɣan ɣef yimesbaniyen seg yibalkuten...

14 Juin 2001, ad yeqqim deg umezruy, ad yelseq deg ccfawat n myal aqvayli, ass-a ad yemmag d ass n waɣlan aqvayli, deg ssawḍen yeqvayliyen akk ad bedden d yiwen n uɣref, s yiwen n wawal, anda i d-swejden iferdisen ara ssutren deg udabu n Lezzayer ad d-yerr fell-asen, yerna iferdisen-a i ssutren d wid ara yilin srid ɣer ufus n uselway i asen-d-igan acqirrew deg 1999 deg Tizi, aɣref aqvayli yugi ameslay akked yimḍebren neɣ d yiɛeggalen i d-yesbed udabu akken ad kelxen fell-asen, maca nnan isutar-a iɣef mtawan akk yeqvayliyen s daw n tesqamut n leɛrac akken ad taweḍ tevrat srid ɣer ufus n uselway Bouteflika s tikli n wugar n 2 Imenyulen n leqvayen i yelḥan ɣer tmanaɣt n Lezzayer. Nezmer ad d-nini ugar n wayen akk igan d leḥsab n yenterrasen i yulin ɣer Lezzayer Tamanaɣt, imi adabu yeɣleq iberdan s waggugen n yigen d yimsulta ur yeǧǧin ara amek ara ɛeddin yimesbaniyen akken ad kecmen ɣer tmanaɣt ; llan wid kemlen ɣef uḍar.

Ayen i yuklal wass-a ad yeqqim deg ccfawat, ayen i d-yewwi ɣef wass-a ad yuɣal d ass n usfuggel n umennuɣ n uɣlan aqvayli ?

Yuklal, imi ɣef wakken i d-nenna, Tamurt Taqvaylit teggugga ɣer tmanaɣt, seld amussu ameqqran deg i d-telḥa deg umezruy akked temɣeweɣt mgal adabu n Lezzayer akken ad tessuter s yiwen n wawal “Tumast”, “Tutlayt”, “Tilelli”, azref d useɣli n miḥyaf d tikkulla ; aɣlan aqvayli yegguma ad yeqqim d tigẓelt s ddaw n udabu n Lezzayer. Ɣas ulama asuter n tumast d tutlayt yella s wudem n Tmaziɣt maca seg wakken tumast-a deg ukala umezruy d agdud aqvayli kan i t-yennuɣen fell-as s wudem unsib, s wawal, s yedles, s tsertit, ula s idammen ; ladɣa deg tnekkra-a n tefsut taberkant anda ɣin gar 127 ɣer 130 n yimeɣrasen d waṭas n wid yettwaɛegben deg tefkka-nsen s rrṣas n yiɣallen n laman n Lezzayer i yerran imesbaniyen d ssiblat i uselmed n tyita s ubeckiḍ ! Tiyita n rrṣas s ddaw n tmuɣli n ugdud n Lezzayer d udabu i yeqqimen yettferriǧ war ma iger-d iman-is, anda ɣer wass-a ur ttwaḥusben ara yimsutla i yenɣan ilmeẓyen i yessutren tilleli.

Aḍris-a ur yezmir ara ad yejmel amezruy n Tmurt Taqvayli, ur yezmir ara daɣen ula ad yejmel akk tinekriwin d tigawin n wasaḍen (Héros) i yennuɣen s yiles d yiɣil d yidim akken ass-a Tamurt n Lezzayer ad teḥsu d akken aẓar-is d Tamaziɣt mačči d Taɛrabt Tineslemt akken i ran ad aɣ-ttegren deg yixfawen-nneɣ ; akken daɣen I mmaren idammen akken ad d-tlal tikti n timanit i yuɣalen ɣer sdat d tikti n timunent akken ad yethenni uɣref aqvayli, i yuklalen ad yili d aɣlan, deg Temhersa n Tmurt n Lezzayer.

 

X.Y

 

 

 

 

 



[1] Yella ula deg taɣect n Lwennas Matub, « Ula d Ben Bella ad as-yeqqar nekk d amaziɣ, adrar n Ǧerǧer yecfa, makken i s-yenna, isem n uqvayli ur teǧǧiɣ, ru a yul…”